Bülent Gürçam:

Gürçam Bülent Fərman oğlu 1962-ci ildə İğdırda anadan olub. Əslən Qərbi Azərbaycanın Canfıda kəndindəndir.
1931-ci ildə Türkiyə ilə o zamankı Sovet Ermənistanı arasında ikitərəfli deportasiya başlayanda atası Fərman Əli oğlu və ailəsi də Qərbi Azərbaycandan - öz dədə-baba torpaqlarından İğdıra köçüblər.
1980-ci ildə Bülent Gürçam Belçikanın paytaxtı Brüssel şəhərinə yollanmışdır. İlk vaxtlar Türkiyədə çıxan «Tərcüman» qəzetinin, daha sonra isə nüfuzlu «Hürriyyət» qəzetinin Belçikadakı ofislərində çalışıb.
Bu illərdə Bülənt Gürçam həmçinin milli diasporumuzun formalaşması və inkişafı naminə böyük işlərə başlayır və bir sıra layihələr həyata keçirir.
Bülənt Gürçamın peşəkar diaspor rəhbəri kimi fəaliyyəti 1980-ci illərdən başlayır. Brüsselə gəldiyi gündən Azərbaycan həqiqətlərinin təbliğatı ilə məşğul olan Bülənt Gürçam 1987-ci ildə Belçikada ilk türk qəzeti olan «Qürbət» adlı qəzet nəşr edir. Elə həmin illərdə Azərbaycanda yaranmış «Vətən» cəmiyyəti ilə əlaqələr quran Bülent Gürçamın məqalələri «Odlar Yurdu» qəzetində də çap edilməyə başlayır və «Vətən» cəmiyyəti ilə bir sıra tədbirlər həyata keçirir. O, Belçikada dəfələrlə «Xocalı çadırı» təşkil etmiş, Ümümdünya Gömrük Təşkilatının Brüsseldəki mərkəzi malikanəsi önünə bütün türk dünyasının rəmzi olan Dədə Qorqud abidəsinin qoyulmasını təşkil etmiş, üzərində Ulu Öndər Heydər Əliyevin və Azərbaycanın çağdaş prezidenti İlham Əliyevin şəkilləri olan xüsusi poçt markaları nəşr etdirmiş, azərbaycanlı əlillərə təmənnasız olaraq Hollandiyadan əlil arabaları alıb gətirmiş, milli bayramlarımızda, xüsusilə Qurban bayramında Azərbaycanın bölgələrində məskunlaşmış qaçqın və məcburi köçkün ailələrinə baş çəkərək onlara qurbanlar paylamış, paytaxt Bakıda ilk dəfə olaraq Avropada geniş qeyd olunan «Qonşular bayramı»nı təşkil etmiş, xarici turistlər üçün fransız dilində «Azərbaycan milli mətbəxi» adlı kitab nəşr etdirmiş» və bir sıra yaddaqalan tədbirlər həyata keçirmişdir.
«Vətən» cəmiyyətinin dəstəyi ilə 1989-cu ilin dekabr ayında vətəni görmək üçün Azərbaycana gələn Bülənt Gürçam qanlı 20 yanvar hadisələrinin şahidi olmuş və bu hadisələri özü ilə gətirdiyi video-kamera və foto-aparatlarla çəkərək bütün dünyaya yaymışdır. 1990-cı il yanvar ayının (ocaq ayının) sonunda Bakıdan çıxarılan Bülənt Gürçam Moskvaya yola düşərək orada Beynəlxalq KİV nümayəndələri ilə canlı əlaqələr quraraq Bakıdakı hadisələri xarici dillərdə bütün dünyaya çatdırmışdır.
B. Gürçam 1995-ci ildə Brüsseldə ilk Azərbaycan səfirliyinin yaranmasında iştirak etmiş, 2000-ci ilədək, 5 il müddətində səfirlikdə çalışmışdır.
Lakin vətəndaşlıq statusu ala bilmədiyi üçün öz ərizəsi ilə tutduğu vəzifədən istefa vermiş və 2000-ci ildə «Belçika Azərbaycan Evi» adlı diaspor təşkilatı yaratmışdır.
«Belçika Azərbaycan Evi» Azərbaycan mədəniyyətini, tarixini, incəsənətini avropalılara tanıtmaq, eləcə də dünya azərbaycanlılarını bir araya toplamaq məqsədilə yaradılmış bir diaspor təşkilatıdır.
2000-ci ildən «Azərbaycan Kültür və İnformasiya» dərgisini, 2003-cü ildən isə hər il Xocalı faciəsinin anımı ərəfəsində dörd dildə «Genocide» jurnalını nəşr edən Bülent, Xocalı həqiqətləri, ermənilərin azərbaycanlılara qarşı terrorçu əməlləri barədə avropalılara bu gün də ən yeni və operativ informasiyalar verməkdə davam edir.
Xatırladaq ki, Bülent Gürçam Azərbaycan Beynəlxalq Universitetinin hüquq fakültəsini bitirib.