Bugün “ANA-ATA” adlı sənədli filmin təqdimatı olub.
[28 Dekabr, 2009]

Film Azərbaycan Gənclərinin Avropaya İnteqrasiyası Təşkilatı (AGAT), Azərbaycan Respublikası Qızıl Aypara Cəmiyyəti, “Aqil M. Film” prodüsser mərkəzi və müğənni Arzumun iştirak etdiyi “Dost” adlı sosial layihə çərçivəsində ərsəyə gəlib. Sənədli filmə isə Gözdən Əlil Uşaqlar üçün Respublika Orta internat Məktəbinin şagirdi 1992-ci il təvəllüdlü Nicat Allahyarov çəkilib. Bu barədə AGAT-ın mətbuat xidmətindən “Euroxəbər”ə məlumat verilib.
Layihənin əsas məqsədi valideyn himayəsindən məhrum olunmuş yeniyetmələrin asudə vaxtını təşkil etmək, onlara mənəvi dəstək olaraq cəmiyyətə inteqrasiya etməsinə yardımçı olmaq, sonda kimsəsiz uşaqlar içərisindən ən istedadlı, səsi olan bir yeniyetməni seçib sənətə yiyələnməsinə şərait yaratmaqla gələcəyinə təkan verməkdir.
Təqdimatda Gənclər və İdman Nazirliyi, Mədəniyyət və Turzim Nazirliyi, Ombudsman Aparatının əməkdaşları, Milli İcmaların Koordinasiya Şurasinin üzvləri, KİV nümayəndələri və QHT rəhbərləri iştirak etdi.
Qeyd edək ki, sosial layihə 2009-cu ilin Azərbaycan Respublikasının prezidenti cənab İlham Əliyevin sərəncamına əsasən “Uşaq ili” elan edilməsi münasibətilə həyata keçirilib.