“Belçika-Azərbaycan Evi” - Yaranma tarixi:

“Belçika-Azərbaycan Evi” bir diaspor təşkilatı kimi simvolik bir zaman ayrıcında, 2000-ci ildə Belçikanın paytaxtı Brüsseldə yaradılıb. Təşkilatın yaradıcısı və rəhbəri əslən Qərbi Azərbaycandan olan Bülənt Gürçamdır.

“Belçika-Azərbaycan Evi”nin yarandığı vaxtdan bu günədək Azərbaycan həqiqətlərinin Avropaya və eləcə də dünya ictimaiyyətinə çatdırılmasında çox böyük işlər görüb.

Bu diaspor qurumu Azərbaycanla Belçika arasında diplomatik əlaqələrin yaranması və inkişafında, bu ölkədə dövlətimizin səfirliyinin yaranmasında, habelə işğal olunmuş ərazilərimiz, Qarabağ torpaqlarının bu günə kimi erməni işğalı altında qalması, Azərbaycan rəhbərliyinin bu istiqamətdə apardığı sülhsevər xarici siyasəti ilə bağlı həqiqətlərin Avropa və dünya xalqlarına çatdırılmasında çox böyük işlər görmüş və bu gün də görməkdədir.

Vaxtaşırı Azərbaycana gələn, doğma vətənində gedən sosial-iqtisadi inkişafla bağlı zəngin informasiya mübadiləsi aparan, baş redaktoru olduğu “EURO Xəbər” qəzeinin səhifələrində Azərbaycanın Avropaya inteqrasiyası məsələlərinə xüsusi önəm verən, ümummilli liderimiz, mərhum prezident Heydər Əliyevin azərbaycançılıq ideyalarına sədaqət nümayiş etdirən, təəssübkeş soydaşımız Bülənt Gürçam Azərbaycandan çox-çox uzaqlarda yaşasa da doğma vətəni ilə nəfəs alır, yaşayır, fəaliyyət göstərir.